Tepung Lawung Warga Rancabanyol, Minggu, 23 Juni 2013

Lamun rek disebut aya istilah "angkatan anyar" unggal tepung lawung warga Rancabanyol meureun bisa oge. Da memang, satiap aya acara riungan sok aya wae warga anyar nu ngahaja datang miluan kopdar alias kopi darat. Saperti kamari poe Minggu, 23 Juni 2013 basa rengrengan warga Rancabanyol ngayakeun riung mungpulung di RM Ampera Jalan Rancabolang, Bandung. Najan di Bandung keur aya pilkada pemilihan wali kota anyar, tap nu daratang mah alhamdulillah leuwih ti 50 urang. Jeung lolobana nu alanyar nu salila ieu sok gogonjakan di group Facebook Banyolan Sunda.

Ilaharna rek ngayakeun kagiatan, persiapan riung mungpulung ieu dilakukeun aya ampir dua minggu saencanna. Di group Facebook Banyolan Sunda dibewarakeun ku Komandan Hansip Rancabanyol yen bakal diayakeun acara tepung lawung dina raraga mapag bulan puasa caritana mah. Nu konfirmasi mah aya 151 urang. Ngan biasa we, pas rek derna sok aya nu bolay, kalayan rupa-rupa alesan; aya nu ngadadak aya acara kulawarga, nganteur ulin budak, atawa memang ngadadak hoream. Mun nu ti Bandung sorangan meureun tangtu geus sidik yen memang keur diayakeun pilkada. Jadi, aya sababaraha baraya nu teu bisa datang kusabab jadi panitia pemilu di wewengkonna sewang-sewangan.

Tah, balik deui ka acara poe Minggu, 23 Juni 2013 ieu, acara dimimitian jam 11 beurang. Alhamdulillah, baraya mulai daratang ka lokasi. Aya Kang Foel nu ngahaja datang di Kalimantan Timur. Terus aya Kang Che Cep Yopi sareng istrina nu kabeneran keur nganteur budakna daptar kuliah di Unpad, tuluy nyimpang ka acara kopdar Banyolan Sunda. Nu lainna, aya oge Ambu Tisum Sunda nu datang ti Kuningan. Oge ti Sumedang aya Teh Sabrina Smd jeung Teh Elis Nugraha. Ti Bogor aya Kang Tatang Lawian, Kang Asec, jeung Ajoy Sudrajat. Oge aya Neng Dina Kusumawardhani nu datang ti Cianjur. Terus ti Cikampek aya Bunhaw jeung Nenk Nunk. Oge Kang Ceef Ones ti Cikarang. Aya oge ti Betawi, Agusti Putra Sanjaya nu ngahaja mondok heula di Bandung ti Saptuna keneh.

Ari ti Bandung mah nu datang teh tos puguh loba pisan. Aya Camat Rancabanyol, Wira Hidayat nu turun ti Lembang. Oge nu lainna: Kang Undang Solihin, Ki Ubbay, Lurah Iwan Bagjasalawasna, Humas Rancabanyol, Irfan Arifuddin,  Cep Beben, Erene Net, Agus Yayan, Amih Ade, Kang Roens, Ivan, Bu Dedeh Rukmaya, Nyimas Kanjeng Ratu Yuyu, Nyi Iroh, Dedi Sobari Akung, Gan Aham, Kang Dedi, Mang Ujang, Andiana, Murangkalih Alit, Taufik Kipow, Kang Agus Saefudin, jrrd.

Acara mah biasa we aya sesi perkenalan. Kabeneran ti mimiti daratang nepi bubaran teu weleh akey-akeyan. Kabiasaan silihkekeak di Facebook teh kababawa wae geuning nepi di alam nyata. Jadi jelas, di Rancabanyol mah watek asli bareuki heureuy teh teu beda jauh antara babaledogan status atawa komen jeung cara ngobrol dina kahirupan sapo-poe. Pantes we mun di group Banyolan Sunda teu weleh silihtembak ku komen teh. Malah, nepi aya "ospek" sagala. Saperti Jang Ajoy nu ngadadak sawan pas dikekeak ku baraya.

Pokona mah, RM Ampera Rancabolang dina poe Minggu eta asa nu sorangan we. Nepi nu keur dalahar di saung lain mah pada marelongkeun. Teu jarang maranehna milu "lalajo" bari milu seuri. Malah nepi aya budak tikunclung sagala kana balong nu aya di handapeun warung. Nu paling lucu mah pas nu tiap nu datang pasti dipelongkeun ku kabehan. Manehna jiga nu bingung, sasalaman tapi teu apal ngaran jeung rupa (da teu kabeh foto profil Facebook make foto asli). Atuh kapaksa kudu ditataan hiji-hiji. Jiga Ceuceu Isma nu nganggap Gan Aham sieun ucing, padahal Ki Ubbay nu sieun ucing mah. Gan Aham mah puguh resepna ka ucing. Atuh jadi salah objek rek ngajailan teh. Amih Ade nu sok "ditandemkeun" jeung Cak Gu Rancabanyol di Facebook, katingali asa guligah. Da pasangan virtualna teu jebul-jebul nepi balik ge.

Tah, intina mah ka baraya nu can pernah milu riung mungpulung, tong hariwang. Da di Banyolan Sunda mah nu geus apal patepung di dunya nyata mah sok asa jadi dulur. Biasana, baraya nu geus paamprok jonghok engkena sok dituluykeun silih-add di Facebook. Atuh heureuyna ge kadituna mah sok asa teu ragab deui lamun geus bener panggih mah. Malah deui, sok aya "tindak lanjut", duka eta mah rek usaha bareng, neangan jodo, atawa jadi sobat. Nu pasti mah di Banyolan Sunda, sing saha wae nu resep kana banyol tur niatna manjangkeun tali silaturahmi kabuka pisan. Da tujuanna, urang Sunda nu ciri khasna resep banyol, eta banyol teh bisa jadi media pikeun ngaraketkeun tali mimitran. Tong nepikeun banyol teh ngan saliwat. Da konsepna ge banyol, lain humor. Ari ngabanyol mah leuwih identik jeung dina basa verbal di kahirupan nyata. Matakna tong aneh mun aya istilah lembur Rancabanyol, kajeun panggih di alam virtual tapi bisa dihijikeun di alam nyata oge saperti kieu. Kitu oge mun "tetembakan" komen bisa dibedakeun cara komunikasi baraya antara nu geus paamprok jonghok di alam nyata jeung baraya nu ngan saliwat wungkul komentar di group Facebook.