Ali Sadikin Pamingpin Nu Teges Tur Disiplin
Hiji poe di Jalan Ahmad Yani, Jakarta. Gubernur Ali Sadikin keur lalampahan rek ka daerah Menteng Wadas. Di satengahing perjalanan, hiji treuk kalayan sangeunahna nyokot jalan di tengah-tengah, ku kituna eta treuk ngahalangan laju kendaraan di tukangeunana.Alatan ngarasa kaluman, Bang Ali nitah supirna sangkan eta treuk diudag. Tapi supir treuk tetep liwar. Dititah eureun kalahkah jiga nu rek ngebut kabur. Sanggeus terus diudag, karek eta treuk teh eureun.
Bang Ali turun tuluy nyampeurkeun si supir treuk. Satengah ngagorowok, Bang Ali nitah supir treuk turun.
“Treuk saha ieu?” tanya Bang Ali.
“Treuk ALRI (Angkatan Laut Republik Indonesia), Pa,” jawab supir.
“Naha ilaing henteu ngarasa boga salah?” tanya Bang Ali deui.
“Henteu, Pa. Pan, sanes kenging nyandak di palebah katuhu?” tembal si supir.
Tanpa ngomong nanaon deui, Bang Ali langsung ngagaplok eta supir supir. Plak! “Lamun mawa muatan beurat, naon kudu make jalan tengah sagala?” ceuk Bang Ali. Samemeh supir nembalan, hiji gaplokan deui ngeunaan pipina.
“Naon silaing teh henteu apal, ieu jalur cepat? Sangeunahna wae siah make jalan teh, kawas jalan ilaing sorangan! Silaing geus henteu paduli ka batur. Silaing geus ngerakeun korps ALRI. Kuring oge ti ALRI!” ceuk Bang Ali bari mere peringatan keras ka si supir treuk keusik eta.
Carita di luhur mangrupa hiji carita nu dicutat tina buku Nostalgia di Jakarta (Penulis Zaenuddin HM, Penerbit Java Media Network). Tah, eta salah sahiji ketegasan ti Bang Ali. Urang Sunda moal bireuk deui ka sosok Bang Ali atawa Ali Sadikin, mantan Gubernur DKI Jakarta nu katelah paling disiplin dina ngurus Jakarta.
Gaya mingpin Bang Ali kasebut cocog jeung kaayaan Ibu Kota jaman harita anu semrawut sarta merlukeun kadisiplinan. Tetela pilihan Soekarno henteu salah. Jenderal Angkatan Laut ieu sanggup nyulap Jakarta ti saukur minangka puseur pamarentahan jadi puseur perdagangan sakaligus industri.
Watak heuras jeung disiplin ti pituin urang Sumedang ieu, lain ngan ditujukan ka aparatna anu henteu disiplin. Waktu mingpin Jakarta salila 11 taun, Bang Ali oge katelah kuat jeung teges dina ngabela prinsip: "Salaku gubernur, kuring kudu nangtayungan sarta nyejahterakan rahayat ti brol di alam dunya nepi ka balik deui ka taneuh. Eta prinsip kuring!"
Ali Sadikin (lahir di Sumedang, Jawa Barat, 7 Juli 1927 – ngantunkeun di Singapura, 20 Mei 2008 dina umur 80 taun). Bang Ali nyaeta saurang Letnan Jenderal KKO-AL (Korps Komando Angkatan Laut) anu ditunjuk ku Presiden Soekarno jadi Gubernur Jakarta dina taun 1966. Samemehna, manehna kungsi nyekel kalungguhan jadi Deputi Kepala Staf Angkatan Laut, Menteri Perhubungan Laut Kabinet Kerja, Menteri Koordinator Kompartemen Maritim/Menteri Perhubungan Laut Kabinet Dwikora sarta Kabinet Dwikora anu disampurnakeun nu dipimpinan Presiden Soekarno. Ali Sadikin jadi gubernur anu pohara ngarakyat sarta dipikacinta ku rahayatna. Alatan eta, manehna boga sebutan akrab ku nu nyicingan Kota Jakarta, nyaeta sebutan "Bang Ali". Samentara istrina (nu kahiji), Ny. Nani Sadikin, saurang dokter gigi, katelah "Mpok Nani".
Ali Sadikin lahir ti kulawarga Raden Sadikin anu mangrupakeun salah sahiji inohong di Sumedang, Jabar. Waktu di Sumedang, Bang Ali namatkeun sakola di Sekolah Dasar Jonggol (kiwari ngaranna SDN Sukaraja), sakola SMP di SMP 1 Sumedang, sarta ahirna pindah ka Ujungberung, Kota Bandung. Sedengkeun Hasan Sadikin nyaeta lanceuk Bang Ali anu ngaranna kiwari diabadikeun jadi ngaran rumah sakit di Bandung.Ali Sadikin nyaeta gubernur anu pohara gede jasana dina ngamekarkeun Jakarta jadi hiji kota metropolitan anu modern. Waktu kapamingpinanana, Jakarta ngalaman loba parobahan alatan proyek-proyek pangwangunan buah pikiran ti Bang Ali, saperti: Taman Ismail Marzuki, Kebun Binatang Ragunan, Proyek Senen, Taman Impian Jaya Ancol, Taman Ria Monas, Taman Ria Remaja, kota satelit Pluit di Jakarta Selatan, pelestarian budaya Betawi di wewengkon Condet, jsb. Bang Ali oge nu mimiti ngayakeun pesta rakyat tiap taun dina Hari Jadi Kota Jakarta, 22 Juni. Dina kariaan eta, sagala rupa aspek budaya Betawi dihirupkeun deui, saperti: kerak telor, ondel-ondel, lenong, sarta topeng Betawi, jsb.
Bang Ali oge sempet mere perhatian ka kahirupan para artis sepuh/lansia di Kota Jakarta anu waktu eta loba mukim di wewengkon Tangki, ku kituna wewengkon kasebut dingaranan Tangkiwood. Sajaba ti eta, Bang Ali oge ngayakeun Pekan Raya Jakarta anu waktu ayeuna leuwih dipikawanoh kalayan ngaran Jakarta Fair, minangka sarana hiburan sarta promosi dagang industri barang sarta jasa ti sakuliah Nusantara jeung wawakil ti luar negeri. Ali Sadikin junun ngabenerkeun sarana transportasi di Jakarta kalayan ngadatangkeun loba beus kota jeung nata trayekna, sarta ngawangun halte (tempat nungguan) beus anu merenah. Keur jaman Bang Ali oge, Jakarta sababaraha kali jadi tuan rumah Pekan Olahraga Nasional (PON) anu nganteurkeun kontingen DKI Jakarta jadi juara umum salila sababaraha kali.
Salah sahiji kawijakan Bang Ali anu kontroversial nyaeta ngamekarkeun hiburan malam kalayan sagala rupa klab malam, ngidinan diayakeunana perjudian di Kota Jakarta kalayan pajegna dipake pikeun pangwangunan Jakarta, sarta ngawangun kompleks Kramat Tunggak minangka lokalisasi pelacuran. Waktu kapamingpinanana oge diayakeun pamilihan Abang-None Jakarta.
Sedengkeun nilik nasib gubernur DKI ayeuna, Bang Ali nganggap ampir sarua jeung waktu manehna jadi gubernur taun 1966. Tapi kaayaan ayeuna lain ngan ekonomi anu bangkrut. Kabehanana ancur, kaasup oge moralna. Baheula mah, ceuk Bang Ali, koruptorna masih bisa diitung ku ramo. Ayeuna, geus teu kaitung.
Nempo kaayaan ayeuna, Bang Ali inget kana ramalan Ronggowarsito. Mangsa ayeuna geus kasebut jaman edan. Urang henteu boga tokoh nagara pikeun picontoeun, alatan kabehanana edan! Salain ti eta, aparat oge kurang teges. Naha enya, hal ieu kamungkinan alatan gaji pegawai negeri nu jauh ti cukup? Padahal, dina jaman manehna mingpin, gajih anggota DPRD ditangtukeun sahenteuna 80% ti gaji DPR Pusat.
Bang Ali ngantunkeun di Singapura dina poe Salasa, 20 Mei 2008 jam 17.30 WIB di RS Gleneagles, Singapura. Samemeh maot, Bang Ali ngawasiat sangkan layonna ditumpangkan di makam pamajikanana, Nani Sadikin. Pemakaman ku cara ditumpangkan ieu luyu jeung upaya Bang Ali tiheula waktu mingpin Jakarta. Bang Ali konsekuen kana programna dina ngabebenah kota Jakarta, yen lahan Jakarta teh beuki dieu beuki sempit. Bang Ali ninggalkeun lima urang anak lalaki sarta pamajikan kaduana (Ibu Linda Syamsuddin Mangan), anu ku Bang Ali ditikah sabada Bu Nani leuwih tiheula ngantunkeun anjeunna. Layon Bang Ali dimakamkeun di TPU Tanah Kusir. Letnan Jenderal TNI KKO AL (Purn) H Ali Sadikin (Bang Ali) narima tanda kehormatan Bintang Mahaputera Adipradana sabab diniley boga jasa luar biasa pikeun negara dan bangsa, khususna dina ngembangkeun Kota Metropolitan.
Di salah sahiji ruas jalan Nasional di wewengkon Cijelag, Kacamatan Tomo, anu kiwari ngaranna Jalan Raya Sumedang-Cirebon, baris diwangun monumen pikeun ngahargaan jasa-jasa Bang Ali. Panungtungan taun 2010 ieu, Yayasan Masyarakat Sejarawan Indonesia Cabang Jawa Barat reujeung Tim Peneliti serta Pengkaji Gelar Daerah (TP2GD) Provinsi Jawa Barat sarta TP2GD Provinsi DKI Jakarta, kalayan inisiatif ngayakeun seminar anu dihadiran ku sakabeh stakeholders Jawa Barat sarta DKI Jakarta ngusulkeun ka pamarentah pusat sangkan Bang Ali diangkat jadi Pahlawan Nasional.
Ngan Bang Ali tacan asup kasinugrahan gelar Pahlawan Nasional. Tanggal 11 November 2010, Pamarentah ngaliwatan Keputusan Presiden No. 52/TK/2010 ahirna nganugrahkeun gelar Pahlawan Nasional ngan ka dua urang tokoh, nyaeta Dr Johannes Leimena jeung Johannes Abraham Dimara. Samemehna, Kementerian Sosial ngusulkeun 10 ngaran tokoh anu geus diseleksi pikeun nampa gelar pahlawan nasional ka Dewan Gelar, Tanda Kehormatan, dan Tanda Jasa. Sapuluh inohong eta teh mantan Gubernur DKI Ali Sadikin ti Jawa Barat, Habib Sayid Al Jufrie ti Sulawesi Tengah, mantan Presiden HM Soeharto ti Jawa Tengah, mantan Presiden KH Abdurrahman Wahid ti Jawa TImur, Andi Depu ti Sulawesi Barat, Johanes Leimena ti Maluku, Abraham Dimara ti Papua, Andi Makkasau ti Sulawesi Selatan, Pakubuwono X ti Jawa Tengah, sarta Sanusi ti Jawa Barat. 
Tidak ada komentar: