Budak Baong "Made In" Cikampek

Kalakuan jaman keur budak mun keur taraweh di tajug Haji Adi. Mun babaturan keur sujud sok dibenyeng sukuna nepi ka jadi nangkuban atawa lebah tuurna sok diselapan kohkol, jadi pas cengkat rek diuk jadi kaganjel nepi ka ngagubragna. Atawa sok aya nu ngadedetkeun sirah batur mun keur sujud ambeh teu bisa cengkat, atawa sok morosotkeun sarung mun keur ruku.Tah, mun aya nu keur tahiyat sok langsung ngasongkeun jempol hareupeun curukna bari ngaharewos "meunaaang..".

Sakapeung taraweh teh sok eureun heula kusabab kalakuan barudak di barisan tukang geus teu bisa dianggap heureuy mun geus aya nu nyurungkeun batur nu keur ruku ti tukang. Jadi epek domino nambrak nepi ka hareup. Mun geus kitu, Pa Emus, guru ngaji, pindah solatna di barisan tukang ngahiji jeung barudak. Geus dikitukan mah, karak barudak teh rarepeh. Atuda ku dehemna Pa Emus ge barudak mah geus merengked. Tapi angger we.... isukanana mah kitu deui.

* Carita kintunan: Che Cep Yopi - Baraya Banyolan Sunda