Cecengekan

Jaman kuring keur budak mah asa loba pisan jenisna kaulinan bebeledagan. Salian ti pepetasan teh, diantarana aya nu disebut cecengekan, nyaeta nu bentukna siga pepetasan ngan ditalian ku bola sapanjang 30-40 cm. Buntelan pepetasan teh diteundeun palebah tengah-tengah bola (benang). Aya nu nyebut oge pepetasan cengek.

Cara makena nyaeta cekelan tungtung bola nu hiji ku leungeun katuhu jeung nu hijji deui ku leungeun kenca. Terus dibedol bola nu katuhu ka katuhu, nu kenca ka kenca. Ngabeledagna sarua jeung pepetasan. Teu sakabeh budak wani ngabeledagkeun cecengekan da moal bisa jauh tina awak nu ngabeledagkeunna.
 

Teuing timana mimitina, kuring jeung babaturan jol boga ideu jail make cecengekan tea. Terus ngurilingan lembur neangan korban nyaeta panto imah nu aya konci engselan. Singket carita, harita manggih imahna Ma Imih (tos maot ayeuna mah). Kabeneran rada paroek deuih palebah lawang pantona teh.

 
Cecengekan nu geus disiapkeun geuwat ditalikeun. Bolana nu hiji ditalikeun kana paku dina kusen jeung nu hiji deui ditalikeun kana gagang panto. Geus beres mah aringkah weh bari ningalikeun ti kajauhan. Teu kungsi lila ngadagoan, Ma Imih pisan nu rek kaluar ti imah teh. Barang dibuka pantona rada pageuh, barang ditempo aya bola nganteng: 

“Nanaonan ieu teh jeung aya nu nalian panto deuih?” Cenah bari nongtak panto dibedol disakalikeun, atuh "darrrr!!" eta cecengekan ngabeledag. Eta mah Ma Imih nepika renghap ranjug bari jojorowokan sagala disebut (limpeuran kolot tea gening). Terus gogorowokan: 

“Pek Siah ngaheureuyan kolot, doraka siah!”

Nu boga dosana mah tingberetek we lalumpatan bari seuseurian.

* Carita kintunan Erene Net - Baraya Banyolan Sunda