Tragedi Anggur

Waktos saum nembe dua dinten. Abdi sareng pun adi balanja ka dayeuh. Angkat tabuh 12 siang. Tos rada sonten uih kinten-kinten tabuh 04:45 sonten. Kaleresan nganggo motor. Pas di jalan bade uih, ningal tukang bungbuahan. Nya liren heula, maksad mah bade meser anggur da meni kabita. Singket carita, tos adu tawar janten ngagaleuh anggur sakilo. 

Anggur beureum meni arageung pikabitaeun pisan. Teu nyadar, abdi nyandak hiji, teras eta anggur dioles-oles heula kana panangan... da sieun kotor. Eh wajah tanpa dosa tea, eta anggur diblemkeun bari di dinya seueur batur. Atuh batur nu aya naringal kalakuan abdi tingkecewis bari mesem. Abdi mah nyantai we da teu emut tea. 

Mung pun adi langsung nyarios: "Teh, panan ieu teh dinten shaum!" 

Ya Allah, langsung diburakeun deui eta anggur. Meni isin pisan. Raray langsung beureum tah pami ninggang si Cepot mah. Ah, abdi sareng pun adi enggal ngabiur uih we.... da isin. Sajajalan seuseurian bari pun adi nyarios: 

"Padahal mah ulah waka diwartosan. Engke wae tos 5 menit wartosanna lumayan anggur hiji... Heheeee!"

* Carita kintunan: Zahra Nurfatimah