Teu Bisa Turun
Bulan puasa keur leutik sok ngabuburit nunutur lanceuk anu kacida judesna, ngaranna Teh Hana. Jaba galak tur harakna moal aya, najan awewe tapi baladna teh lalaki wungkul. Hiji waktu si Eteh badami rek mupu jambu aer anu Aki Awa. Ari aki Awa teh minangka mitoha Mas Hardoyo lanceuk Unie nu nomer dua. Aki Awa mah tara ngambek mun jambuna dialaan barudak teh. Asal ulah batal we puasana cenah. Balad si Eteh ngabring. Unie nuturkeun ti tukang bari susulumputan, da sieun dicarekan ku si Eteh. Nepi ka lebah tangkal jambu aer tea, langsung patingterekel naraek. Umie mah bati olohok we da asli teu bisa naek kana tatangkalan. Eta mah menta sasiki ge ka si Eteh kalahkah dititah ngala sorangan. Kesel campur kabita..nya tuluy we Unie nyobaan naek. Najan bari jeung ngadaregdeg ge, teu burung akhirna nepi oge. Atoh pisan saku merekis ku jambu aer. Wanci Ashar. Aki Awa nitah turun ka barudak, sina sarolat heula di mushola. Batur mah gancang tarurun. Ari Unie? Ngan bingung...goak we ceurik da teu bisa turun. Untung Aki Awa apaleun. Atuh buru-buru dibantuan turun tina tangkal jambu aer. Eta barudak nu di handap nyarurakan... matak sawan kuya!
Tidak ada komentar: